Тутийо Мизроб
Ҷаъм Кунат Бозӣҷ: Хушом Гулям
Ноябри 10 , 2019
Тутийо Мизроб шер дар борае зив.
Нафамум чӣз қубобам ас ху зив маш
Фукаϑ хез дар иҷобам ас ху зив маш,
Йи лавард хуш, йи лавард нист ба кор йид,
Йи лав соф ких̌т шарат йид ачга мавид.
Аҷаб бечора зив! Чӣзат гинагор?
Туйат дар хизматат, маш ас ту безор.
Царанг осẙникаϑ ас нẙми миллат,
Шаратамат кинам мардумте минат.
Икид зив мардуманд, йид шахси мол нист,
Ҳу зив ҷат халқ ниғẙɣам, йенди қол нист.
Алойид одаменен зив чи парδед,
Ху δустен тепч ху, халқ молтӣр кинен δед.
Йадет дис макинам, йид тẙқиналат,
Наких̌т бахих̌ йи чай маш то қийẙмат.
Ниғẙɣет, нур шароит суδҷ муайо,
Ди ҷат мардум ху зив-тӣр weδҷе даwo,
Укӯмат δоδҷ иҷозат, хуб кӯмак йид,
Ту маграт зибан, лẙв бедарак йид.
Мисол ас соле сӣйум варе машард,
Қасам ас нẙме мардум харе машард.
Царанг нур йоδд баробар соле сӣйум,
Йадет макам ми мардум ачга рагум.
Зиweδам аз ху ғẙɣандир ди пахта:
Фукаϑ въуд йобуйен дастӯр пи нухта.
Ту нур во соли сӣйум пех̌ниоде,
Йу наɣҷӣд, ачга мачис тар зибоде.
Нурам ҷам сиц фукаϑ ар чай ас ар ҷо,
Қарор δаδам зиweδам хурд алифбо.
Сипорам олименард, даδ ди созен,
Ба тези мактабенард там ди бозен.
طوطیا مضراب
جعم کُن ات بازیج: خوشام غلام
گرڎېنیج اس سریلیک تر خُږنۈنے: سرورشاه ارکان
۱۰ نومبر ۲۰۱۹
طوطیا مضراب شعر در باره یے زِڤ
نه فهم اُم چیز قُباب ٲم اس خو زِڤ مٲش
فُکݑ خېز در حجاب ٲم اس خو زِڤ مٲش،
یے لهڤ ارد خوش، یے لهڤ ارد نِست بکار یِد،
یے لهڤ صاف کِښت شرعت یِد اچگه مه ڤِد.
عجب بېچاره زِڤ! چیزت گِنهگار؟
تو یت در خذمت ات، مٲش اس بېزار.
څرهنگ آسۈنِکݑ اس نۈمے ملت،
شرعت ٲم ات کِن ٲم مردم تے مِنت.
اِک اِد زِڤ مردم اند، یِد شخصے مال نِست،
خو زڤ جهت خلق نِغۈږ ٲم، یېندے قال نست.
علاید آدمېن ېن زڤ چے پرڎئد،
خو ڎُستېن تئپچ خو، خلق مال تیر کَنېن ڎئد.
یدېت دِس مه کِن ٲم، یِد طۈقے لعنت،
نه کِښت بخښښ یے چهی مٲش تا قیۈمت.
نِغۈږېت، نُر شرایط سُڎج معیا،
دے جهت مردم خو زڤ تیر وېڎج دعوا،
حکومت ڎاڎج اجازت، خُب کمک یِد،
تو مگر ات زِبن، لۈڤ بېدرک یِد.
مثال اس سالے سی یوم ڤهرې مٲش ارد.
څرهنگ نُر یاڎد برابر سالے سی یوم،
یدېت مهک ٲم مے مردم اچگه راه گم.
زِوئڎ ٲم اس خو غۈږ اندیر دے پخته:
فُکݑ ڤُد یابو یېن دستور پے نُخته.
تو نُر ڤا سالے سی یوم پېښنهادے،
یو نَږجید، اچگه مه چس تر زِبادے.
نُر ٲم جعم سِڅ فُکݑ هر چهی اس هر جا،
قرار ڎهڎ ٲم زِوئڎ ٲم خو الفبا.
سِپار ٲم عالِم ېن ارد، دڎ دے سازېن،
به نېزے مکتب ېن ارد تهم دے بازېن.
